Page:Chrétien de Troyes - Cligès, 1921.djvu/240

Tel qu’il s’an afole et confont
Plus que tuit li autre ne font,
Et mervoille est qu’il ne s’ocit,
Mes ancor le met an respit
Tant que l’ore et li termes veingne
Qu’il la desfuee et qu’il la teingne
Et savra s’ele est vive ou non.
Sor la fosse sont li baron,
Qui le cors i colchent et metent,
Mes sor Jehan ne s’antremetent
De la sepolture aseoir,
Qu’il ne la porent nes veoir,
Einz sont trestuit pasmé cheü ;
S’a Jehanz boen leisir eü
De feire quanque il i fist.
La sepolture si assist
Que nule autre chose n’i ot ;
Bien la seele et joint et clot.
Et lors se poïst bien prisier
Qui sanz malmetre et sanz brisier
Ovrir ne desjoindre seüst
Rien que Jehanz fet i eüst.
Fenice est an la sepolture,
Tant que vint a la nuit oscure,
Mes.xxx. chevalier la gardent,
Si i a.x. cierges qui ardent,
Grant clarté et grant luminaire.
Enuié furent de mal traire
Li chevalier et recreü ;
S’ont la nuit mangié et beü
Tant que tuit s’andorment ansanble.
A l’anuitier de cort s’en anble
Cligés et de tote la gent ;
N’i ot chevalier ne sergent
Qui seüst pas que il devint.
Ne fina tant qu’a Jehan vint,
Qui de quanqu’il puet le consoille.