Page:Chrétien de Troyes - Cligès, 1921.djvu/239

Seelez vostre sepolture,
Si con reisons est et droiture,
El plus bel leu del cemetire. »
Jehanz respont : « Volentiers, sire. »
Et Jehanz maintenant s’an torne,
La sepolture bien atorne
Et de ce fist que bien apris :
.I. lit de plume a dedanz mis
Por la pierre qui estoit dure,
Et plus encor por la froidure,
Et por ce que soef li oelle,
Espant desus et flors et fuelle ;
Mes por ce le fist ancor plus
Que la coute ne veïst nus,
Qu’il avoit en la fosse mise.
Ja ot en fet tot le servise
As eglises et as barroches,
Et sonoit an adés les cloches,
Si con l’en doit feire por mort.
Le cors comande qu’an aport,
S’iert an la sepolture mis,
Don Jehanz s’est tant entremis,
Car mout l’a feite riche et noble.
An trestote Costantinoble
N’a remés ne petit ne grant
Qui n’aut aprés le cors plorant ;
Si maudïent la mort et blasment,
Chevalier et vaslet se pasment,
Et les dames et les puceles
Batent lor piz et lor memeles,
S’ont a la mort prise tançon.
« Morz, fet chascune, reançon
De ma dame que ne preïs ?
Certes, petit gahaing feïs,
Car a nostre oes sont granz les pertes. »
Mes Cligés an fet duel a certes,