Page:Chrétien de Troyes - Cligès, 1921.djvu/236

Qu’es paumes gitier li voldront
Einçois que parler ne la facent.
Feu et plonc quierent et porchacent,
Le feu alument et plonc fondent.
Ensi afolent et confondent
La dame li felon ribaut,
Qui le plonc tot boillant et chaut,
Si com il l’ont del feu osté,
Li ont anz es paumes colé.
N’encor ne lor est pas assez
De ce que li plons est passez
Parmi les paumes d’outre en outre,
Einz dïent li cuivert avoutre
Que, s’ele ne parole tost,
Or endroit la metront an rost
Tant que ele iert tote greslie.
Cele se test ne ne lor vie
Sa char a batre n’a malmetre.
Ja la voloient el feu metre
Por rostir et por graïllier,
Qant des dames plus d’un millier
Des genz se partent et desvoient.
A la porte vienent, si voient
Par un petit de roverture
L’angoisse et la malaventure
Que cil feisoient a la dame,
Qui au charbon et a la flame
Li feisoient sosfrir martire.
Por l’uis brisier et desconfire
Aportent coigniees et mauz.
Granz fu la noise et li assauz
A la porte brisier et fraindre.
S’or pueent les mires ataindre,
Ja lor sera sanz atandue
Tote lor desserte rendue.