Page:Chrétien de Troyes - Cligès, 1921.djvu/233

Ne nus arriere ne l’en oste.
Et sor le piz et sor la coste
Li met la main et sant sanz dote
Que ele a el cors l’ame tote ;
Bien le set et bien l’aparçoit.
L’empereor devant lui voit,
Qui de duel s’afole et ocit ;
En haut s’escrie, si li dit :
« Empereres, conforte toi,
Je sai certainnemant et voi
Que ceste dame n’est pas morte.
Leisse ton duel, si te conforte,
Car se vive ne la te rant,
Ou tu m’oci ou tu me pant. »
Maintenant abeisse et acoise
Par le palés tote la noise,
Et l’empereres dit au mire
C’or li loist comander et dire
Sa volanté tot a delivre ;
Se l’empererriz fet revivre,
Sor lui iert sire et comanderres ;
Mes panduz sera come lerres,
Se il li a manti de rien.
Et cil respont : « Je l’otroi bien,
Ne ja de moi n’aiez merci
S’a vos parler ne la faz ci,
Tot sanz panser et sanz cuidier.
Faites moi cest palés vuidier,
Que uns ne autres n’i remaingne.
Le mal qui la dame mehaingne
M’estuet veoir priveemant.
Cist dui mire tant seulemant
Avoec moi ici remandront,
Car de ma conpaignie sont,
Et tuit li autre fors s’an issent. »