Page:Chrétien de Troyes - Cligès, 1921.djvu/230

Ne pié ne main ne remeüst,
Qui vive escorchier la deüst,
N’el ne se crosle ne dit mot,
Et s’antant ele bien et ot
Le duel que l’empereres mainne
Et le cri don la sale est plainne.
Et par tote la vile crïent
Les genz qui plorent et qui dïent :
« Dex, quel enui et quel contraire
Nos a fet la morz deputaire !
Morz, trop es male et covoiteuse
Et sorprenanz et envieuse,
Qui ne puez estre saoulee.
Onques mes si male golee
Ne poïs tu doner au monde.
Morz, qu’as tu fet ? Dex te confonde,
Qui as tote biauté estainte.
La meillor chose et la plus sainte
As ocise, s’ele durast,
Que onques […] a feire andurast.
Trop est Dex de grant pacience
Qant il te done avoir puissance
Des soes choses depecier.
Or se deüst Dex correcier
Et gitier hors de ta bataille,
Car trop as fet grant anviaille
Et grant orguel et grant oltrage. »
Ensi toz li pueples enrage,
Tordent lor poinz, batent lor paumes,
Et li clerc an lisent lor saumes,
Et prïent por la boene dame
Que Dex merci li face a l’ame.
Entre les lermes et les criz,
Si con tesmoingne li escriz,
Sont venu troi fisicien
De Salerne, mout ancien,
Ou longuemant orent esté ;
Por le duel se sont aresté,