Page:Chrétien de Troyes - Cligès, 1921.djvu/228

Cil la fera morir ou vivre,
An celui se met a delivre
Et de santé et de sa vie.
De Deu cuident que ele die,
Mes mout a male entancion,
Qu’ele n’antant s’a Cligés non :
C’est ses dex qui la puet garir
Et qui la puet feire morir.
Ensi l’empererriz se garde,
Que nus mires ne s’an prant garde,
N’ele ne vialt mangier ne boivre,
Por l’empereor mialz deçoivre,
Tant que tote est et pale et perse.
Et sa mestre antor li converse,
Qui par mout merveilleuse guile
A quis par trestote la vile,
Celeemant, que nus nel sot,
De son entouchement plein pot *,
De mortel mal sanz garison.
Por mialz feire la traïson,
L’aloit visiter mout sovant
Et si li metoit an covant
Qu’ele la garroit de son mal.
A chascun jor un orinal
Li portoit por veoir s’orine
Tant qu’ele vit que medecine
Ja mes eidier ne li porroit
Et meïsmes ce jor morroit.
Cele a l’orine raportee,
Si l’a estroitemant gardee
Tant que l’empereres leva.
Maintenant devant lui s’an va,
Si li dist : « Se vos comandez,
Sire, toz voz mires mandez,
Car ma dame a s’orine feite,
Qui de cest mal mout se desheite ;