Page:Chrétien de Troyes - Cligès, 1921.djvu/227

Mes se l’empereres, ses sire,
Ne vient a li, ne l’en chaut il.
A grant tort et a grant peril
Por Cligés metre la covient,
De ce li poise qu’il ne vient,
Car rien fors lui veoir ne quiert.
Cligés par tans devant li iert,
Tant qu’il li avra reconté
Ce qu’il a veü et trové.
Devant li vint, si li a dit,
Mes mout i demora petit,
Car Fenice, por ce qu’an cuit
Que ce que li plest li enuit,
A dit an haut : « Fuiez, fuiez !
Trop me grevez et enuiez,
Car si sui de mal agrevee,
Ja n’en serai sainne levee. »
Cligés cui cist moz atalante
S’an vet feisant chiere dolante,
Qu’ainz si dolante ne veïstes.
Mout puet estre par defors tristes,
Mes ses cuers est si liez dedanz,
Car a sa joie est atendanz.
L’empererriz, sanz mal qu’ele ait,
Se plaint et malade se fait,
Et l’empereres qui la croit
De duel feire ne se recroit
Et mires querre li envoie,
Mes el ne vialt que nus la voie,
Ne les leisse a li adeser.
Ce puet l’empereor peser
Qu’ele dit que ja n’i avra
Mire fors.i. qui li savra
Legieremant doner santé
Qant lui vendra a volanté.