Page:Chrétien de Troyes - Cligès, 1921.djvu/225

Au mur s’est Johanz acostez
Et tint Cligés par la main destre.
« Sire, fet il, huis ne fenestre
N’est hom qui an cest mur seüst.
Et cuidiez vos que l’en peüst
An nule guise trespasser
Sanz anpirier et sanz quasser ? »
Cligés respont que il nel croit
Ne nel crerra ja s’il nel voit.
Lors dit Jehanz qu’il le verra
Et l’uis del mur li overra.
Jehanz, qui avoit feite l’uevre,
L’uis del mur li desserre et oevre,
Si ne le malmet ne ne quasse.
Li uns avant l’autre trespasse,
Et descendent par une viz
Parmi.i. estage vostiz,
Ou Jehanz ses oevres feisoit,
Qant riens a feire li pleisoit.
« Sire, fet il, ci ou nos somes,
N’ot onques de trestoz les homes
Que Dex a fez fors que nos deus,
Et s’est si aeisiez cist leus
Con vos verroiz jusqu’a n’a gaires.
An cest leu soit vostre repaires,
Et vostre amie i soit reposte.
Tex ostex est boens a tel oste,
Qu’il i a chanbres et estuves
Et eve chaude par les cuves,
Qui vient par conduit desoz terre.
Qui voldroit leu aeisié querre
Por s’amie metre et celer,
Mout li covandroit loing aler
Einz qu’il trovast si covenable.
Mout le tanroiz a delitable,
Qant vos avroiz par tot esté. »