Page:Chrétien de Troyes - Cligès, 1921.djvu/224

Tant que tot cuide avoir veü ;
Si li a mout le jor pleü,
Et dit que mout est boene et bele.
Bien i sera sa dameisele
Toz les jorz que ele vivra,
Que ja nus hon ne l’i savra.
« Non voir, sire, ja n’iert seüe.
Or cuidiez vos avoir veüe
Tote ma tor et mes deduiz ?
Encor i a de tex reduiz
Que nus hom ne porroit trover,
Et se vos i loist esprover
Au mialz que vos porroiz cerchier,
Ja n’i savroiz tant reverchier,
Ne nus, tant soit soutix et sages,
Que plus trovast ceanz estages
S’ainçois ne li mostre mout bien.
Sachiez, il n’i faut nule rien,
Ne chose qu’a dame coveingne.
Or n’i a plus mes que ça veingne,
Car mout est bele et aeisiee,
Et s’est par desoz esleisiee
Ceste torz, si con vos verrez,
Ne ja l’uis trover n’i porrez
Ne antree de nule part.
Par tel engin et par tel art
Est fez li huis de pierre dure
Que ja n’i troveroiz jointure.
-Or oi mervoille, fet Cligés,
Alez avant, et je aprés,
Car mout m’est tart que je ce voie. »
Lors s’est Jehanz mis a la voie,
Si mainne Cligés par la main
Jusqu’a.i. huis poli et plain,
Qui toz est poinz et colorez.