Page:Chrétien de Troyes - Cligès, 1921.djvu/219

Que a lui se poïst nus prandre,
Car anvers lui sont tuit novice
Con anfes qui est a norrice.
As soes oevres contrefeire
Ont apris quanqu’il sevent feire
Cil d’Antioche et cil de Rome ;
Mes an ne set plus leal home.
Mes or le voldrai esprover,
Et se je i puis foi trover,
Lui et ses oirs toz franchirai,
Ne ja vers lui n’en tricherai
Que vostre consoil ne li die
Se il ce me jure et afie
Que leaumant m’an eidera
Ne ja ne m’an descoverra. »
Cele respont : « Or soit ensi ! »
Atant Cligés fors s’en issi
Par son gré et si s’en ala.
Et cele mande Tessala,
Sa mestre qu’ele ot amenee
De sa terre dom el fu nee ;
Et Tessala vint en es l’ore
Qu’ele ne tarde ne demore,
Mes el ne set por coi la mande.
A privé consoil li demande
Que ele vialt et que li plest.
Cele ne li çoile ne test
De son panser nes une rien.
« Mestre, fet ele, je sai bien
Que chose que je ci vos die
N’iert ja par vos avant oïe,
Car mout vos ai bien esprovee
Et mout vos ai sage trovee.
Tant m’avez fet que mout vos aim.
De toz mes max a vos me claim,
Ne je n’an praing aillors consoil.