Page:Chrétien de Troyes - Cligès, 1921.djvu/214

Car mon cuer n’en puis desaerdre
Ne je ne l’en ferai ja force.
En moi n’a mes fors que l’escorce,
Car sanz cuer vif et sanz cuer sui.
N’onques an Bretaigne ne fui,
Si a mes cuers lonc sejor fet ;
Ne sai s’il a bien ou mal fet.
-Dame, quant fu vostre cuers la,
Dites moi quant il i ala,
An quel tans et an quel seison,
Se c’est chose que par reison
Doiez dire moi ne autrui,
S’il i fu lors quant je i fui.
-Oïl, mes ne le coneüstes.
Il i fu lors quant vos i fustes,
Et avoec vos s’an departi.
-Dex, je ne l’i soi ne ne vi.
Dex, que nel soi ? Se le seüsse,
Certes, dame, je li eüsse
Boene conpaingnie porté.
-Mout m’eüst or reconforté.
Amis, bien le deüssiez feire,
Car je fusse mout deboneire
A vostre cuer se lui pleüst
A venir la ou me seüst.
-Dame, certes, o vos vint il.
-O moi ? N’ot il pas trop d’essil,
Qu’ausi rala li miens o vos.
-Dame, don sont ci avoec nos
Endui li cuer, si con vos dites ;
Car li miens est vostres toz quites.
-Amis, et vos ravez le mien,
Si nos antravenomes bien.
Et sachiez bien, se Dex me gart,
Qu’ainz vostre oncles n’ot en moi part,
Car moi ne plot ne lui ne lut.