Page:Chrétien de Troyes - Cligès, 1921.djvu/213

Fenice a parole l’en mist
De Bretaigne premieremant ;
Del san et de l’afeitemant
Monseignor Gauvain li anquiert,
Tant qu’an la parole se fiert
De ce dom ele se cremoit :
Demanda li se il amoit
Dame ne pucele el païs.
A ce ne fu mie restis
Clygés ne lanz de bien respondre ;
Isnelemant li sot espondre,
Des que ele l’en apela.
« Dame, fet il, j’amai de la,
Mes n’amai rien qui de la fust.
Ausi con escorce sanz fust
Fu mes cors sanz cuer an Bretaingne.
Puis que je parti d’Alemaingne,
Ne soi que mes cuers se devint,
Mes que ça aprés moi s’an vint.
Ça fu mes cuers et la mes cors.
N’estoie pas de Grece fors,
Car mes cuers i estoit venuz,
Por cui je sui ça revenuz.
Mes il ne vient ne ne repeire,
Ne je nel puis a moi retreire,
Ne nel quier certes ne ne puis.
Et vos comant a esté puis
Qu’an cest païs fustes venue ?
Quel joie i avez puis eüe ?
Plest vos la gent, plest vos la terre ?
Je ne vos doi de plus requerre,
Fors tant se li païs vos plest.
-Einz ne me plot, mes or me nest
Une joie et une pleisance.
Por proiere ne por pleisance
Sachiez ne la voldroie perdre,