Page:Chrétien de Troyes - Cligès, 1921.djvu/212

Mes folie fust et forsens.
Les genz acorent de toz sens,
Qui a lui veoir se deduient ;
Parmi la cité le conduient
Tuit, et a pié et a cheval,
Jusqu’au palés emperial.
De la joie qui ci fu feite
N’iert ore parole retreite,
Car ses oncles li abandone
Tot quanqu’il a, fors la corone ;
Bien vialt qu’il praingne a son pleisir
Quanqu’il voldra por lui servir,
Ou soit d’argent ou de tresor ;
Mes il n’a soing d’argent ne d’or
Qant son panser descovrir n’ose
A celi por cui ne repose,
Et boene eise a a li del dire
S’il ne dotast de l’escondire ;
Car tote jor la puet veoir
Et seul a seul lez li seoir,
Sanz contredit et sanz desfanse,
Car nus n’i entant mal ne panse.
Grant piece aprés ce qu’il revint,
Un jor seus an la chanbre vint
Celi qui n’ert pas s’anemie,
Et bien sachiez, ne li fu mie
Li huis a l’encontre botez.
Delez li se fu acotez,
Et tuit se furent trait ensus,
Si que pres d’ax ne se sist nus
Qui lor paroles entandist.