Page:Chrétien de Troyes - Cligès, 1921.djvu/209

Mes bel li est, si en a honte,
Li sans an la face li monte
Si que tot vergoignier le voient.
Parmi la sale le convoient,
Si l’ont devant le roi conduit ;
Mes la parole leissent tuit
De lui loer et losengier.
Ja fu droite ore de mangier,
Si corrurent les tables metre
Cil qui s’an durent antremetre.
Les tables sont el palés mises ;
Li un ont les toailles prises,
Et li autre les bacins tienent,
Si donent l’eve a cez qui vienent,
Tuit ont lavé, si sont assis.
Et li rois a par la main pris
Cligés, si l’asist devant lui,
Car mout voldra savoir ancui
De son estre s’il onques puet.
Del mangier a parler n’estuet,
Car si furent li mes plenier
Con s’an eüst buef a denier.
Qant toz lor mes orent eüz,
Lors ne s’est plus li rois teüz.
« Amis, fet il, aprendre vuel
Se vos lessastes par orguel
Qu’a ma cort venir ne deignastes
Tantost qu’an cest païs antrastes,
Et por coi si vos estrangiez
De nos et voz armes changiez.
Et vostre non me raprenez
Et de quel gent vos estes nez. »
Cligés respont : « Ja celez n’iert. »
Tot ce que li rois li requiert
Si l’a dit et reconeü.
Et quant li rois l’a coneü,
Lors l’acole, lors li fet joie,