Page:Chrétien de Troyes - Cligès, 1921.djvu/208

De tornoiemant qui trop dure,
Bien le pueent a tant lessier.
Departi sont li chevalier,
Car li rois le vialt et comande.
Cligés por tot […] hernois mande,
Car le roi siudre li covient ;
Au plus tost qu’il puet a cort vient,
Mes bien fu atornez einçois,
Vestuz a guise de François.
Maintenant que il vint a cort,
Chascuns encontre lui acort,
Que uns ne autres n’i areste,
Einz ont fet tel joie et tel feste
Com il onques pueent greignor ;
Et tuit cil l’apelent seignor
Qu’il avoit pris au tornoier,
Mes il lor vialt a toz noier
Et dit que trestuit quite soient
De lor foiz s’il cuident et croient
Que ce fust il qui les preïst.
N’i a.i. seul qui ne deïst :
« Ce fustes vos, bien le savons.
Vostre acointance chiere avons,
Et mout vos devriens amer
Et prisier et seignor clamer,
Qu’a vos n’est nus de nos parauz.
Tot autresi con li solauz
Estaint les estoiles menues,
Que la clartez n’an pert es nues,
La ou li rai del soloil nessent,
Ausi estaignent et abessent
Noz proesces contre les voz,
Si soloient estre les noz
Mout renomees par le monde. »
Cligés ne set qu’il lor responde,
Car plus le loent tuit ansanble
Que il ne voldroit, ce li sanble ;