Page:Chrétien de Troyes - Cligès, 1921.djvu/199

« Don ne veez vos quele ancontre
Nos ont envoiez cil de la ?
Bien sache qui seü ne l’a
Que des.iiii. meillors qu’an sache
Est cist li uns qu’est en la place.
-Qui est il donc ? — Si nel veez ?
C’est Sagremors li Desreez.
-C’est il ? — Voire, sanz nule dote. »
Cligés, qui ce ot et escote,
Sist sor Morel, s’ot armeüre
Plus noire que more meüre ;
Noire fu s’armeüre tote.
Del ranc aus autres se desrote
Et point Morel qui se desroie,
Mes n’i a.i. seul qui le voie,
Qui ne dïent l’uns d’ax a l’autre :
« Cist s’an vet bien lance sor fautre,
Ci a chevalier mout adroit,
Mout porte ses armes a droit,
Mout li siet li escuz au col.
Mes an le puet tenir por fol
De la joste qu’il a enprise
Vers.i. des meillors a devise
Que l’en sache an tost cest païs.
Mes cist dom est ? Dont est naïs ?
Qui le conuist ? — Ne gié. — Ne gié.
Mes il n’a pas sor lui negié. »
Einsi entandent au parler,
Et cil lessent chevax aler,
Que plus ne se vont atardant,
Car plus sont engrés et ardant
De l’asanblee et de la joste.
Cligés fiert, si qu’il li ajoste
L’escu au braz, le braz au cors.