Page:Chrétien de Troyes - Cligès, 1921.djvu/197

Et Cligés a la mer passee,
S’est an Galinguefort venuz ;
La s’est richemant contenuz
A bel ostel, a grant despanse.
Mes toz jorz a Fenice panse,
Que il ne l’entroblie une ore.
La ou il sejorne et demore,
S’ont tant enquis et demandé
Ses genz, cui il l’ot comandé,
Que dit et reconté lor fu
Que li baron le roi Artu
Et li cors meïsmes le roi
Avoient anpris.i. tornoi.
Es plains devers Osenefort,
Qui pres ert de Galinguefort,
Ensi ert anpris li estorz
Qui devoit durer.iiii. jorz.
Mes ainz porroit mout sejorner
Cligés, por son cors atorner,
Se rien li faut endemantiers,
Car plus de.xv. jorz antiers
Avoit jusqu’au tornoiemant.
A Londres fet isnelemant
III de ses escuiers aler.
Si lor comande a aporter
Trois peires d’armes desparoilles,
Unes noires, autres vermoilles,
Les tierces verz, mes au repeire
Comande que chascune peire
Fust coverte de toile nueve,
Que, se nus an chemin les trueve,
Ne savra de quel taint seront
Les armes qu’il aporteront.
Li escuier maintenant muevent,
A Londres vienent et si truevent
Apareillié quanque il quierent.