Page:Chrétien de Troyes - Cligès, 1921.djvu/196

Si cuide cil qu’il die voir,
Car quant il est fel et enrievres,
Malvés et coarz come lievres,
Chiches et fos et contrefez
Et vilains an diz et an fez,
Le prise par devant et loe
Tiex qui derriers li fet la moe ;
Mes einsi le loe oiant lui
Que il en parole a autrui,
Et si fet quainses que il n’ot
De quanqu’antr’aus.ii. dïent mot ;
Mes s’il cuidoit qu’an ne l’oïst,
Ja ne diroit don cil joïst ;
Et se ses sires vialt mantir,
Cil est prez del tot consantir.
Qui les corz et les seignors onge
Servir le covient de mançonge.
Autel covient que mes cuers face
S’avoir vialt de son seignor grace ;
Loberres soit et losengiers.
Mes Cligés est tex chevaliers,
Si biax, si frans et si leax
Que ja n’iert mançongiers ne fax
Vers moi, tant le sache lober,
Qu’an lui n’a riens que amander.
Por ce voel que mes cuers le serve,
Car li vilains dit an sa verve :
"Qui a prodome se comande
Malvés est se de lui n’amande ".
Einsi travaille Amors Fenice,
Mes cist travauz li est delice,
Qu’ele ne puet estre lassee.