Page:Chrétien de Troyes - Cligès, 1921.djvu/195

Que li uns est sires des deus.
Por coi ne puet li miens toz seus
Autant come li suens par lui ?
Si fussent d’un pooir andui.
Pris est mes cuers, qui ne se puet
Movoir quant li suens ne se muet.
Et se li suens erre ou sejorne,
Li miens s’aparoille et atorne
De lui siudre et d’aler aprés.
Dex, que ne sont li cors si pres
Que je par aucune meniere
Ramenasse mon cuer arriere !
Ramenasse ? Fole mauveise,
Si l’osteroie de son eise,
Einsi le porroie tuer.
La soit ! Ja nel quier remuer,
Einz voel qu’a son seignor remaingne
Tant que de lui pitiez li praigne,
Qu’ainçois devra il la que ci
De son sergent avoir merci,
Por ce qu’il sont an terre estrenge.
S’or set bien servir de losenge
Si com an doit servir a cort,
Mout iert riches einz qu’il s’an tort.
Qui vialt de son seignor bien estre
Et delez lui seoir a destre,
Si com il est us et costume,
Del chief li doit oster la plume,
Neïs quant il n’en i a point.
Mes ici a un malvés point,
Car il aplaigne par defors
Et se il a dedanz le cors
Ne malvestié ne vilenie,
Ja n’iert tant cortois qu’il li die,
Einz fera cuidier et antendre
Qu’a lui ne se porroit nus prandre
De proesce ne de savoir.