Page:Chrétien de Troyes - Cligès, 1921.djvu/194

Ne m’aimme pas, ce sai je bien,
Qui me desrobe et tost le mien.
Jel sai ? Por coi ploroit il dons ?
Por coi ? Ne fu mie an pardons,
Asez i ot reison de quoi.
N’en doi neant prandre sor moi,
Car de gent qu’an aimme et conoisse
Se part an a mout grant angoisse.
Qant il leissa sa conoissance,
Si en ot enui et pesance,
Et s’il plora, ne m’an mervoil.
Mes qui li dona cest consoil,
Qu’an Bretaigne alast demorer,
Ne me poïst mialz acorer.
Acorez est qui son cuer pert.
Mal doit avoir qui le suen pert,
Mes je ne le desservi onques.
Ha, dolante, por coi m’a donques
Cligés morte sanz nul forfet ?
Mes de neant le met an plet,
Car je n’i ai nule reison.
Ja Cligés an nule seison
Ne deignast, ce cuit je tres bien,
Que ses cuers fust parauz au mien.
Mes parauz, fet ele, n’est il mie.
Et s’a li miens pris conpaingnie
Au suen ne ja n’en partira,
Ja li suens sanz le mien n’ira,
Car li miens le siust en anblee,
Tel conpaignie ont assanblee.
Car a la verité retraire,
Il sont mout divers et contraire.
Comant sont contraire et divers ?
Li suens est sire et li miens sers,
Et li sers maleoit […] suen
Doit feire au seignor tot son buen
Et lessier toz autres afeires.
A moi en chaut, lui n’en chalt gueires,
De mon cuer ne de mon servise.
Mout me poise ceste devise