Page:Chrétien de Troyes - Cligès, 1921.djvu/193

Amors, qui me done a lui tote,
Espoir le me ra doné tot ;
Mes ce me resmaie de bot
Que c’est une parole usee,
Si repuis bien estre amusee,
Car tiex i a qui par losange
Dïent nes a la gent estrange
« Je sui vostres, et quanque j’ai »,
Si sont plus jeingleor que jai.
Don ne me sai au quel tenir,
Car ce porroit tost avenir
Qu’il le dist por moi losangier.
Mes je li vi color changier
Et plorer mout piteusemant.
Les lermes, au mien jugemant,
Et la chiere piteuse et mate
Ne vindrent mie de barate,
N’i ot barat ne tricherie.
Li oel ne me mantirent mie
Don je vi les lermes cheoir.
Asez i poi sanblanz veoir
D’amor, se je neant en sai.
Oïl, tant que mal i panssai ;
Mar l’ai apris et retenu,
Car trop m’en est mesavenu.
Mesavenu ? Voire, par foi,
Morte sui quant celui ne voi
Qui de mon cuer m’a desrobee,
Tant m’a losengiee et gabee.
Par sa lobe et par sa losenge
Mes cuers de son ostel s’estrenge
Ne ne vialt o moi remenoir,
Tant […] et moi et mon menoir.
Par foi, donc m’a cil maubaillie
Qui mon cuer a en sa baillie.