Page:Chrétien de Troyes - Cligès, 1921.djvu/192

Ja nel metra fors a nul fuer,
Tant crient larrons et robeors ;
Mes de neant li vient peors
Et por neant crient les escobles,
Car cist avoirs n’est mie mobles,
Einz est ausi com edefiz
Qui ne puet estre desconfiz
Ne par deluge ne par feu,
Ne ja nel movera d’un leu.
Mes ele n’an est pas certainne,
Por ce i met et cure et painne
A encerchier et a aprandre
A quoi ele s’an porra prandre ;
En plusors menieres l’espont.
A li seule opose et respont,
Et fet tele oposition :
« Cligés par quele entancion
« Je sui toz vostres » me deïst,
S’Amors dire ne li feïst ?
De quoi le puis je justisier ?
Par qu’il me doie tant prisier
Que dame me face de lui ?
N’est il plus biax que je ne sui,
Et mout plus gentix hom de moi ?
Nule rien fors Amors ne voi
Qui cest don me poïst franchir.
Par moi qui ne li puis ganchir
Proverai, se il ne m’amast,
Que por miens ne se reclamast ;
Ne plus que je soe ne fusse
Tote, ne dire nel deüsse,
S’Amors ne m’eüst a lui mise ;
Ne ne deüst an nule guise
Cligés dire qu’il fust toz miens,
S’Amors ne l’a en ses liens.
Car s’il ne m’aimme, il ne me dote.