Page:Chrétien de Troyes - Cligès, 1921.djvu/190

Ne m’estovra gueires lasser
A aler des ci jusque la.
En Grece trop longue voie a,
Et se an Grece m’an aloie,
Trop me seroit longue la voie
De Costantinoble an Bretaigne.
Mes droiz est qu’a vos congié praigne
Com a celi cui ge sui toz. »
Mout ot fez sopirs et sangloz
Au partir, celez et coverz,
Que uns n’ot tant les ialz overz
Ne tant i regart cleremant
Q’au departir certenemant
De verité savoir peüst
Que antr’aus.ii. amor eüst.
Cligés, ja soit ce qu’il li poist,
S’an part tantost con il li loist ;
Pansis s’an vet, pansis remaint
L’empereres et autre maint.
Mes Fenice est sor toz pansive ;
Ele ne trueve fonz ne rive
El panser dom ele est emplie,
Tant i entant et monteplie.
Pansive est an Grece venue ;
A grant enor i fu tenue
Come dame et empereriz ;
Et ses cuers et ses esperiz
Est a Cligés, quel part qu’il tort,
Ne ja ne quiert qu’a li retort
Ses cuers se cil ne li aporte
Qui muert del mal don il l’a morte ;
Et s’il garist, ele garra,
Ne ja cil ne le conparra
Qu’ele autresi ne le conpert.
En sa face ses max apert,
Car mout est palie et changiee.
Mout est de sa face estrangiee