Page:Chrétien de Troyes - Cligès, 1921.djvu/189

Cligés tant con lui plot et sist
D’avoir et de conpaignons prist,
Mes a oes le suen cors demainne
.IIII. divers destriers an mainne,
Un sor,.i. fauve, un blanc, un noir.
Mes trespassé vos dui avoir
Ce qu’a trespasser ne fet mie.
Cligés a Fenice s’amie
Vet congié querre et demander,
Qu’a Deu la voldra comander.
Devant li vient, si s’agenoille
Plorant, que de ses lermes moille
Tot son bliaut et son hermine
Et vers terre ses ialz ancline,
Que de droit esgarder ne l’ose ;
Einsi come d’aucune chose
Ait vers li mespris et forfeit,
Si sanble que vergoigne en eit.
Et Fenyce, qui le regarde,
Come foible chose et coarde,
Ne set quele acoisons le mainne.
Si li a dit a quelque painne :
« Amis, biax frere, levez sus !
Seez lez moi, ne plorez plus
Et dites moi vostre pleisir.
-Dame, que dire ? que teisir ?
Congié vos quier et congié proi,
Car an Bretaigne aler en doi.
-Donc me dites por quel besoigne,
Einçois que le congié vos doigne.
-Dame, mes peres me pria,
Qant il morut et devia,
Que por rien nule ne leissasse
Que je an Bretaigne n’alasse,
Tantost con chevaliers seroie ;
Et por rien nule ne voldroie
Son comandemant trespasser.