Page:Chrétien de Troyes - Cligès, 1921.djvu/182

De lui armer formant s’esploite.
Qant armez fu de chief an chief,
L’empereres, cui mout fu grief,
Li va l’espee ceindre au flanc.
Cligés desor l’arrabi blanc
S’an monte armez de totes armes ;
A son col pant par les enarmes
.I. escu d’un os d’olifant,
Tel qui ne peçoie ne fant
Ne n’i ot color ne pointure.
Tote fu blanche s’armeüre,
Et li destriers et li hernois
Si fu plus blans que nule nois.
Cligés et li dus sont monté,
S’a li uns a l’autre mandé
Qu’a la mivoie assanbleroient
Et de.ii. parz lor genz seroient
Tuit sanz espees et sanz lances,
Par sairemanz et par fiances
Que ja tant hardi n’i avra,
Tant con la bataille durra,
Qui s’ost movoir por nul mal faire
Ne plus qu’il s’oseroit l’uel traire.
Par cest consoil sont asanblé,
S’a a chascun mout tart sanblé
Que il avoir doie la gloire
Et la joie de la victoire.
Mes ainz que cop feru i ait,
L’empereriz mener s’i fait,
Que por Cligés est trespanssee.
Mes de ce s’est bien apanssé
Que, se il muert, ele morra ;
Ja nus eidier ne li porra
Qu’avuec lui morir ne se lest,
Car sanz lui vie ne li plest.
Qant el chanp furent tuit venu,