Page:Chrétien de Troyes - Cligès, 1921.djvu/180

Que seul a seul, se Cligés ose,
Iert d’aus.ii. la bataille prise ;
Si la fera par tel devise
Que, se Cligés vaint la bataille,
L’empereres seürs s’an aille
Et sa pucele o lui an maint ;
Et se Cligés ocit ou vaint,
Qui grant domage li a fait,
Por ce trives ne pes n’i ait,
Qu’aprés chascuns son mialz ne face.
Ceste chose li dus porchace
Et fet par un suen druguemant,
Qui greu savoit et alemant,
As.ii. empereors savoir
Qu’ainsi vialt la bataille avoir.
Li messagiers dit son message
En l’un et en l’autre lengage,
Si que […] l’entandirent tuit.
Tote l’oz an fremist et bruit,
Et dïent que ja Deu ne place
Que Cligés la bataille face ;
Et andui li empereor
An sont en mout grant esfreor.
Mes Cligés as piez lor an chiet
Et prie lor que ne lor griet,
Mes s’ainz fist rien qui lor pleüst,
Que il ceste bataille eüst
En guerredon et an merite ;
Et s’ele li est contredite,
Ja mes n’iert a son oncle un jor
Ne por son boen ne por s’enor.
L’empereres, qui tant avoit
Son neveu chier com il devoit,
Par la main contremont l’an lieve
Et dist : « Biax niés, formant me grieve
Ce que tant vos sai conbatant,
Qu’aprés joie duel en atant.