Page:Chrétien de Troyes - Cligès, 1921.djvu/179

D’amors aresniee et requise,
Comant que la chose an fust prise,
S’ele ne fust fame son oncle.
Por ce sa plaie li reoncle
Et plus li grieve et plus li dialt,
Qu’il n’ose dire ce qu’il vialt.
Einsi vers lor gent s’an revienent,
Et s’il de rien parole tienent,
N’i ot chose don lor chausist.
Chascuns sor un boen cheval sist,
Et chevalchent a grant esploit
Vers l’ost ou mout grant duel avoit.
Par tote l’ost de duel forssenent,
Mes a nul voir dire n’asenent,
Qu’il dïent que Cligés est morz.
De c’est li diax et granz et forz,
Et por Fenice se resmaient,
Ne cuident que ja mes la raient.
S’est por celi et por celui
Tote l’oz an mout grant enui.
Mes cil ne tarderont mes gueires,
Si changera toz li afeires,
Car ja sont an l’ost retorné,
S’ont le duel a joie torné.
Joie revient et diax s’an fuit,
A l’encontre lor vienent tuit,
Si que tote l’oz s’i assanble.
Li dui empereor ansanble,
Qant il oïrent la novele
De Cligés et de la pucele,
Ancontre vont a mout grant joie.
A chascun est tart que il oie
Comant Cligés avoit trovee
L’empereriz et recovree.
Cligés lor conte, et cil qui l’oent
Mout s’an mervoillent et mout loent
Sa proesce et son vasselage.
Et d’autre part li dus enrage,
Qui jure et afiche et propose