Page:Chrétien de Troyes - Cligès, 1921.djvu/177

Des ialz parolent par esgart,
Mes des boches sont si coart
Que de l’amor qui les justise
N’osent parler an nule guise.
Se cele comancier ne l’ose,
N’est mervoille, car sinple chose
Doit estre pucele et coarde.
Mes il, qu’atant, de coi se tarde,
Qui por li est par tot hardiz,
S’est vers li seule acoardiz ?
Dex, ceste criemme don li vient,
C’une pucele seule tient,
Sinple et coarde, foible et quoie ?
A ce me sanble que je voie
Les chiens foïr devant le lievre,
Et la turtre chacier le bievre,
L’aignel le lou, li colons l’aigle,
Et si fuit li vilains sa maigle,
Dom il vit et dom il s’ahane,
Et si fuit li faucons por l’ane,
Et li gripons por le heiron,
Et li luz fuit por le veiron,
Et le lyon chace li cers,
Si vont les choses a envers.
Mes volantez an moi s’aüne
Que je die reison aucune
Por coi ç’avient a fins amanz
Que sens lor faut et hardemanz
A dire ce qu’il ont an pans,
Qant il ont eise et leu et tans.
Vos qui d’amors vos feites sage
Et les costumes et l’usage
De sa cort maintenez a foi
N’onques ne faussastes sa loi,
Que qu’il vos an doie cheoir,
Dites se l’en puet nes veoir
Rien qui por amor abelisse,
Que l’en n’an tressaille ou palisse.