Page:Chrétien de Troyes - Cligès, 1921.djvu/176

Et quanque Cligés en ataint
Devant son cop rien ne remaint
Que tot ne confonde et deronpe ;
S’est plus tornanz que n’est la tronpe
Que l’escorgiee mainne et chace.
Proesce et l’amors qui le lace
Le font hardi et conbatant ;
Les Sesnes a traveilliez tant
Que toz les a morz et conquis,
Cez afolez et cez ocis.
Mes c’un seul an leisse eschaper,
Por ce qu’il erent per a per,
Et por ce que par lui seüst
Li dus sa honte et duel eüst.
Qant li dus sot sa mescheance,
S’en ot grant ire et grant pesance.
Et Cligés Fenice an remainne,
Qui d’amors le travaille et painne.
Mes s’or ne prant a li confesse,
Lonc tans li iert amors angresse,
Et a celi, s’ele se test,
Que ne die ce que li plest,
C’or puet bien dire en audiance
L’uns a l’autre sa conciance.
Mes tant criement le refuser
Qu’il n’osent lor cuers ancuser.
Cil crient que cele nel refust,
Cele ancusee se refust
S’ele ne dotast la refuse.
Et neporquant des ialz ancuse
Li uns a l’autre son panser,
S’il s’an seüssent apanser.