Page:Chrétien de Troyes - Cligès, 1921.djvu/175

Qui por lui mout se desconforte,
Mes nel set pas si pres de li.
.I. poindre qui li abeli
A fet Cligés, lance sor fautre,
Si fiert.i. Sesne et puis.i. autre,
Si qu’anbedeus a un seul poindre
Les a fez contre terre joindre,
Et sa lance de fresne froisse,
Et cil chieent par tel angoisse
Qu’il n’ont pooir de relever,
Por lui mal feire ne grever,
Car des cors furent anpirié.
Li autre.iiii. tuit irié
Vont Cligés ferir tuit ansanble,
Mes il n’enbrunche ne ne tranble,
N’il ne li ont estrié tolu.
L’espee o le branc esmolu
Fors del fuerre isnelemant sache,
Et por ce que boen gré l’en sache
Celi a cui d’amors s’atant,
Vet ancontre.i. Sesne batant,
Sel fiert de l’espee esmolue
Que il li a del bu tolue
La teste et del col la mitié,
C’onques n’en ot autre pitié.
Fenice qui l’esgarde et voit
Ne set pas que ce Cligés soit ;
Ele voldroit que ce fust il,
Mes por ce qu’il i a peril
Dit qu’ele ne le voldroit mie ;
De.ii. parz li est boene amie,
Car sa mort crient et s’enor vialt.
Et Cligés a l’espee aquialt
Les.iii. qui fier estor li randent,
Son escu li troent et fandent,
Mes n’ont pooir de lui baillier
Ne de son hauberc desmaillier.