Page:Chrétien de Troyes - Cligès, 1921.djvu/173

Cil qui ot plus isnel cheval
Vint devant toz criant en haut :
« Dus de Sessoigne, Dex te saut !
Dus, recovree avons t’amie.
Or n’an manront li Grezois mie,
Car ja t’iert bailliee et randue. »
Qant la parole a entandue
Cligés, que cil li vet criant,
N’en a mie son cuer riant,
Einz est mervoille qu’il n’enrage.
Onques nule beste salvage,
Lieparz ne huivres ne lieons,
S’ele vit perdre ses feons,
Ne fu si ardanz n’enragiee
Ne de conbatre ancoragiee
Con fu Clygés, car lui ne chaut
De vivre se s’amie faut.
Mialz vialt morir qu’il ne la rait.
Mout a grant ire an son deshait
Et mout grant hardemant li done.
L’arrabi broche et esperone
Et vet desor la targe pointe
Au Sesne doner tele anpointe,
De tel vertu, tot sanz mantir,
Qu’al cuer li fet le fer santir.
Cist a Cligés aseüré.
Plus d’un arpant tot mesuré
A l’arrabi point et brochié,
Einçois que l’autre ait aprochié,
Car tuit venoient desroté.
Ne l’un ne l’autre n’a doté,
Car seul a seul joste a chascun ;
Ses ancontre par un et un,
Ne li uns a l’autre n’aïe.
Au secont fet une anvaïe,