Page:Chrétien de Troyes - Cligès, 1921.djvu/172

Li dus n’avoit d’el covoitié,
Si prant trives tot main a main
As Grezois jusqu’a l’andemain.
Trives ont prises et donees.
Les genz le duc sont retornees
Et li Grezois sanz plus d’atente
Repeirent chascuns a sa tente.
Mes Cligés seus en une engarde
Remest, que nus ne s’an prant garde,
Tant que les.xii. qui aloient
Vit, et celi qu’il an menoient
Tot le grant cors et les galos.
Cligés, qui vialt aquerre los,
Vers aus s’esleisse en es le pas,
Car por neant ne fuient pas,
Ce se pansse et li cuers li dit.
Tot maintenant que il les vit
S’esleisse aprés ces, qui le voient
Venir ; si cuident bien et croient
Que ce soit li dus qui les sit.
« Contratendons le un petit,
Il s’est toz seus partiz de l’ost,
Et si vient aprés nos mout tost. »
N’i a celui qui ne le cuit ;
Contre lui voelent aler tuit,
Mes seus i vialt chascuns aler.
Cligés covient a avaler
Un grant val entre.ii. montaingnes.
Ja mes d’ax ne seüst ansaignes,
Se cil contre lui ne venissent,
Ou il ne le contreatendissent.
Li.vi. li vienent a l’encontre.
Mes par un et un les ancontre ;
Avoec la pucele remainnent
Li autre, qui soef l’en mainent
Le petit pas et l’anbleüre.
Et li.vi. vont grant aleüre,
Poingnant vienent parmi.i. val.