Page:Chrétien de Troyes - Cligès, 1921.djvu/166

Qui de ses conpaignons se part ;
Si les anchauce cele part
Ou la force le duc estoit,
Et ja tote l’oz s’aparçoit
De feire as Grex une anvaïe ;
Toz seus les chace sanz aïe
Et li vaslet, tuit esperdu
De lor seignor qu’il ont perdu,
Vienent devant le duc corrant,
Si li ont conté an plorant
Le domage de son neveu.
Li dus ne le tient mie a jeu,
Mes Deu et toz les sainz an jure
Que joie ne boene aventure
En tote sa vie n’avra
Tant con celui vivant savra
Qui son neveu li a ocis,
Et dit que mout iert ses amis
Et mout le reconfortera
Qui le chief l’en aportera.
Lors s’est uns chevaliers vantez
Que par lui li iert presantez
Li chiés Cligés, s’il l’atant tant.
Cligés les vaslez chaça tant
Que sus les Sesnes s’anbati,
Et cil le voit qui s’anhati
Qu’il en aportera la teste.
Or s’en vet, que plus n’i areste.
Et Cligés s’est el retor mis
Por esloignier ses anemis,
Si revint la toz eslessiez
Ou ses conpaignons ot lessiez,
Mes n’en i a.i. seul trové,
Qu’as trez s’an furent retorné
Por lor aventure conter.
Et l’emperere ot fet monter