Page:Chrétien de Troyes - Cligès, 1921.djvu/164

Mout fu la poisons bien confite
Qui si le travaille et demainne.
De neant est an si grant painne,
Car por voir cuide, et si s’an prise,
Qu’il ait la forteresce prise,
Et devient lassez et recroit,
Einsi le cuide, einsi le croit.
A une foiz vos ait tot dit,
C’onques n’en ot autre delit.
Ensi l’estovra demener
Toz jorz mes, s’il l’en puet mener.
Mes ainz qu’a salveté la teigne,
Criem que granz anconbriers li veigne,
Car quant il s’an retornera,
Li dus pas ne sejornera
Cui el fu premerains donee.
Grant force a o lui amenee,
S’a totes les marches garnies,
Et a la cort sont les espies
Qui li font savoir chascun jor
Tot le covine et tot l’ator,
Et conbien il sejorneront
Et quant il s’an retorneront,
Par quel leu et par quel trespas.
L’empereres ne tarda pas
Aprés ses noces longuemant ;
De Coloigne part lieemant,
Et l’empereres d’Alemaingne
Le conduist a riche conpaingne,
Por ce que mout crient et ressoigne
La force le duc de Sessoigne.
Li dui empereor ne finent,
Tresc’outre Reneborc cheminent,
Et furent par une vespree
Logié soz Dunoe an la pree.