Page:Chrétien de Troyes - Cligès, 1921.djvu/163

Ne ja mes n’an sera delivres,
Einz le fera tant traveillier
Qu’an dormant le fera veillier.
Or est l’empereres gabez.
Mout ot evesques et abez
Au lit seignier et beneïr.
Qant ore fu d’aler gesir,
L’empereres, si com il dut,
La nuit avoec sa fame jut.
Si com il dut ? Ai ge manti,
Qu’il ne la beisa ne santi ;
Mes an.i. lit jurent ansanble.
La pucele de peor tranble,
Qui mout se dote et mout s’esmaie
Que la poisons ne soit veraie.
Mes ele l’a si anchanté
Que ja mes n’avra volanté
De li ne d’autre, s’il ne dort,
Et lors en avra tel deport
Con l’an puet an songent avoir,
Et si tendra le songe a voir.
Neporquant cele le resoingne :
Premieremant de lui s’esloigne,
Ne cil apruichier ne la puet
Qu’araumant dormir li estuet.
Il dort et songe, et veillier cuide,
S’est an grant poinne et an estuide
De la pucele losangier.
Et ele li feisoit dongier,
Et se desfant come pucele,
Et cil la prie, et si l’apele
Mout dolcemant sa dolce amie ;
Tenir la cuide, n’an tient mie,
Mes de neant est a grant eise,
Car neant tient et neant beise,
Neant tient, a neant parole,
Neant voit et neant acole,
A neant tance, a neant luite.