Page:Chrétien de Troyes - Cligès, 1921.djvu/159

Mes se vos tant saviez d’art
Que ja cil an moi n’eüst part
Cui je sui donee et plevie,
Mout m’avriez an gré servie.
Mestre, car i metez antante
Que cil sa fiance ne mante
Qui au pere Clygés plevi,
Si con il meïsme eschevi,
Que ja n’avroit fame esposee.
Sa fiance en iert reüsee,
Car adés m’espousera il.
Mes je n’ai pas Cligés si vil
Que mialz ne vuelle estre anterree
Que ja par moi perde danree
De l’enor qui soe doit estre.
Ja de moi ne puisse anfes nestre
Par cui il soit desheritez.
Mestre, or vos an entremetez,
Por ce que toz jorz vostre soie. »
Lors li dit sa mestre et otroie
Que tant fera conjuremanz
Et poisons et anchantemanz
Que ja de cest empereor
Mar avra garde ne peor,
Et si girront ansanble andui,
Mes ja tant n’iert ansanble o lui
Qu’ausi ne puisse estre aseür
Con s’antre aus.ii. avoit un mur ;
Mes seul itant ne li enuit
Qu’il a en dormant son deduit,
Car quant il dormira formant
De li avra joie a talant
Et cuidera tot antresait
Que an veillant sa joie en ait,
Et ja rien n’en tenra a songe,