Page:Chrétien de Troyes - Cligès, 1921.djvu/158

Est niés celui que prendre doi.
Et se cil a joie de moi,
Donc ai ge la moie perdue,
Ne je n’i ai nule atandue.
Mialz voldroie estre desmanbree
Que de nos.ii. fust remanbree
L’amors d’Ysolt et de Tristan,
Don mainte folie dit an,
Et honte en est a reconter.
Ja ne m’i porroie acorder
A la vie qu’Isolz mena.
Amors en li trop vilena,
Que ses cuers fu a un entiers
Et ses cors fu a.ii. rentiers.
Ensi tote sa vie usa
N’onques les.ii. ne refusa.
Ceste amors ne fu pas resnable,
Mes la moie iert toz jorz estable,
Car de mon cors et de mon cuer
N’iert ja fet partie a nul fuer.
Ja mes cors n’iert voir garçoniers
N’il n’i avra.ii. parçoniers.
Qui a le cuer, cil a le cors,
Toz les autres an met defors.
Mes ce ne puis je pas savoir
Comant puisse le cors avoir
Cil a cui mes cuers s’abandone,
Qant mes peres autrui me done
Ne je ne li os contredire.
Et quant il est de mon cors sire,
S’il an fet chose que ne vuelle,
N’est pas droiz c’un autre i acuelle.
Ne cil ne puet fame espouser
Sanz sa fiance trespasser,
Einz avra, s’an ne li fet tort,
Cligés l’empire aprés sa mort.