Page:Chrétien de Troyes - Cligès, 1921.djvu/150

Pueent an chançons et an vers
Chanter a une concordance.
Si vos pruis par ceste sanblance
C’uns cors ne puet.ii. cuers avoir,
Ce sachiez vos trestot de voir ;
Ne por ce que se li uns set
Quanqu’il covoite et quanqu’il het,
Ne plus que les voiz qui assanblent
Si que tote une chose sanblent,
Et si ne pueent estre a un,
Ne puet cors avoir cuer que un.
Mes ci nen a mestier demore,
Qu’autre besoigne me cort sore.
De la pucele et de Clygés
M’estuet parler des ore mes.
Si orroiz del duc de Sessoigne,
Qui a envoié a Coloigne
.I. suen neveu, vaslet mout juevre,
Qui a l’empereor descuevre
Que ses oncles li dus li mande
Qu’a lui pes ne trives n’atande
Se sa fille ne li envoie.
Et cil ne se fit an la voie
Qui avoec lui mener l’an cuide,
Qu’il ne la trovera pas vuide,
Einz li iert mout bien desfandue,
Se ele ne li est randue.
Bien fist li vaslez son message,
Tot sanz orguel et sanz oltrage ;
Mes ne trueve respondeor,
Ne chevalier n’enpereor ;
Et quant vit que tuit se teisoient
Et par desdaing ice feisoient,
De cort se part par desfiance.
Mes jovenetez et anfance
Li firent Cligés anhatir
De behorder au departir.