Page:Chrétien de Troyes - Cligès, 1921.djvu/148

Mout ot biauté et po savoir,
Mes Clygés en ot plus grant masse,
Tant con li ors le cuivre passe
Et plus que je ne di encor.
Si chevol resanbloient d’or
Et sa face rose novele ;
Nes ot bien fet et boche bele,
Et fu de si boene estature
Con mialz le sot feire Nature,
Que an lui mist trestot a un
Ce que par parz done a chascun.
En lui fu Nature si large
Que trestot mist en une charge,
Si li dona quanque ele ot.
Ce fu Cligés, qui an lui ot
San et biauté, largesce et force.
Si ot le fust atot l’escorce,
Si sot plus d’escremie et d’art
Que Tristanz, li niés le roi Marc,
Et plus d’oisiax et plus de chiens.
En Cligés ne failli nus biens.
Clygés, si biax com il estoit,
Devant le roi son oncle estoit,
Et cil qui ne le conoissoient
De lui esgarder s’angoissoient ;
Et ausi li autre s’angoissent,
Qui la pucele ne conoissent,
Qu’a mervoilles l’esgardent tuit.
Mes Clygés par amors conduit
Vers li ses ialz covertemant
Et ramainne si sagemant
Que a l’aler ne au venir
Ne l’an puet an por fol tenir,
Mes deboneiremant l’esgarde,
Et de ce ne se prenent garde
Que la pucele a droit li change.