Page:Chrétien de Troyes - Cligès, 1921.djvu/146

Mes s’anors […] abeissera.
Devant Coloigne ne s’areste,
Ou l’emperere a une feste
D’Alemaigne mout grant tenue.
Or est a Coloigne venue
La conpaignie des Grezois ;
Tant i ot Grex et tant Tiois
Qu’il an estut fors de la vile
Logier plus de.xl. mile.
Granz fu l’asanblee des genz
Et formant fu la joie granz
Que li dui empereor firent,
Qui mout volantiers s’antrevirent.
El palés qui mout estoit lons
Fu l’asanblee des barons.
Et l’empereres maintenant
Manda sa fille isnelemant.
La pucele ne tarda pas,
El palés vint en es le pas,
Et fu si bele et si bien feite
Con Dex meïsmes l’eüst feite,
Qui mout i pot a traveillier
Por la gent feire merveillier.
Onques Dex qui la façona
Parole a home ne dona
Qui de biauté dire seüst
Tant que cele plus n’an eüst.
Fenyce ot la pucele a non ;
Ce ne fu mie sanz reison,
Car si con fenix li oisiax
Est sor toz les autres plus biax
Ne estre n’an pot c’uns ansanble,
Ice Fenyce me resanble :
N’ot de biauté nule paroille.
Ce fu miracles et mervoille
C’onques a sa paroille ovrer
Ne pot Nature recovrer.