Page:Chrétien de Troyes - Cligès, 1921.djvu/143

Et po fet an se por lui non.
Alys n’i a fors que le non,
Qui empereres est clamez ;
Mes cil est serviz et amez,
Et qui ne le sert par amor,
Servir li covient par peor.
Par l’un et par l’autre justise
Tote la terre a sa devise.
Mes cele qu’an apele Mort
N’espargne home foible ne fort,
Que toz ne les ocie et tut.
Alixandre morir estut,
C’uns max l’a mis an sa prison,
Don ne puet avoir garison.
Mes ainz que morz le sorpreïst,
Son fil manda et si li dist :
« Biax filz Cligés, ja ne savras
Conuistre con bien tu vaudras
De proesce ne de vertu
Se a la cort le roi Artu
Ne te vas esprover einçois
Et as Bretons et as Einglois.
Se avanture la te mainne,
Ensi te contien et demainne
Que tu n’i soies coneüz,
Jusqu’a tant qu’as plus esleüz
De la cort esprovez te soies.
De ce te lo que tu me croies,
Et s’an leu viens, ja ne t’esmaies
Que a ton oncle ne t’essaies,
Monseignor Gauvain, ce te pri,
Que tu nel metes en obli. »
Aprés cest amonestemant
Ne vesqui gaires longuemant.
Soredamors tel duel en ot
Que aprés lui vivre ne pot ;
De duel fu morte avoeques lui.