Page:Chrétien de Troyes - Cligès, 1921.djvu/138

Por Alixandre anvoier querre
An Bretaigne, ou il estoit,
Ou mout volantiers arestoit.
De Grece murent li message,
Por voir acuellent lor veage ;
Si les a pris une tormante
Qui lor nef et lor gent tormante.
En la mer furent tuit noié,
Fors un felon, un renoié,
Qui amoit Alis le menor
Plus qu’Alixandre le graignor.
Qant il fu de mer eschapez,
An Grece s’an est retornez,
Et dit qu’avoient tuit esté
Dedanz cele mer tenpesté,
Qant de Bretaigne revenoient
Et lor seignor en ramenoient ;
N’en est eschapez mes que il
De la tormante et del peril.
Cil fu creüz de sa mançonge :
Sanz contredit et sanz chalonge
Prenent Alis, si le coronent,
L’empire de Grece li donent.
Mes ne tarda mie granmant
Qu’Alixandres certainnemant
Sot qu’anperere estoit Alis.
Au roi Artus a congié pris,
Qu’il ne voldra mie sanz guerre
A son frere lessier sa terre.
Li rois de rien ne le destorbe,
Einçois li dit que si grant torbe
En maint avoec lui de Galois,
D’Escoz et de Cornoalois
Que ses frere atandre ne l’ost
Qant assanblee verra s’ost.
Alixandres, se lui pleüst,
Grant force menee en eüst ;