Page:Chrétien de Troyes - Cligès, 1921.djvu/134

Que ja mes n’ait pesance une ore ;
Mes tot ce li sanble demore,
Que il ne vient si com il sialt.
Par tans avra ce qu’ele vialt,
Car anbedui par contançon
Sont d’une chose an grant tançon.
Mout estoit Alixandre tart
Que seulemant d’un dolz regart
Se poïst a leisir repestre.
Grant piece a que il volsist estre
El tref la reïne venuz
Se aillors ne fust detenuz.
La demore mout li desplot ;
Au plus tost que il onques pot
Vint a la reïne an son tref.
La reïne l’a encontré,
Qui de son pansé mout savoit,
Sanz ce que dit ne li avoit,
Mes bien s’an est aparceüe.
A l’antrer del tref le salue
Et de lui conjoïr se painne,
Bien set quiex acheisons le mainne.
Por ce qu’an gré servir le vialt,
Lez li Soredamors aquialt,
Et furent il troi seulemant,
Loing des autres a parlemant.
La reïne premiers comance,
Qui n’estoit de rien an dotance
Qu’il ne s’antreamassent andui,
Cil cele, et cele celui.
Bien le cuide de fi savoir
Et bien set que ne puet avoir
Soredamors meillor ami.
Antredeus fu assise enmi,
Si lor comance une reison
Qui vint an leu et an seison :
« Alixandre, fet la reïne,
Amors est pire que haïne,
Qui son ami grieve et confont.