Page:Chrétien de Troyes - Cligès, 1921.djvu/130

Si se pasment sus et demantent,
Mes trestuit li escu lor mantent,
Que des lor n’i a c’un ocis
Qui avoit non Leriolis,
Et celui porté an eüssent
Se la verité an seüssent.
Mes ausi sont an grant enui
Des autres come de celui.
Ses ont toz aportez et pris,
Mes de toz fors d’un ont mespris ;
Mes autresi con cil qui songe,
Qui por verité croit mançonge,
Les boisent li escu boclé,
Car la mançonge font verté.
Par les escuz sont deceü.
A toz les cors sont esmeü,
Si s’an vindrent jusqu’a lor tantes,
Ou mout avoit de genz dolantes.
Mes au duel que li Greu feisoient
Trestuit li autre se teisoient ;
A lor duel ot grant aünee.
Or cuide et croit que mar fust nee
Soredamors, qui ot le cri
Et la plainte de son ami.
De la plainte et de la dolor
Pert fame morte a la color,
Et ce la grieve mout et blesce
Qu’ele n’ose de sa destrece
Demostrer sanblant en apert.
An son cuer a son duel covert,
Et se nus garde s’an preïst,
A sa contenance veïst
Con grant destrece avoit el cors
Au sanblant qui paroit defors.
Mes tant avoit chascuns a feire,
A la soe dolor retreire,
Que il ne li chaloit d’autrui.