Page:Chrétien de Troyes - Cligès, 1921.djvu/124

De c’est gabez et deçeüz,
Car de rien ne les areisone,
Ne uns de cez mot ne li sone,
Et vont outre mu et teisant,
Et tel sanblant de duel feisant
Qu’aprés aus lor lances traïnent
Et desoz les escuz s’anclinent,
Et mout sanble que il se duellent.
Por ce vont quel part que il vuelent,
Tant que les.iii. murs ont passez.
Lessus truevent sergenz assez
Et chevaliers avoec le conte,
Don ne vos sai dire le conte.
Mes desarmé estoient tuit,
Fors que tant seulemant li huit
Qui de l’ost repeirié estoient.
Et cil meïsmes s’aprestoient
De lor armeüres oster,
Mes trop se pueent ja haster,
Car cil ne se celeront plus
Qui sor aus sont venu lessus,
Einz lessent corre les destriers,
Mout s’afichent sor les estriés,
Ses anvaïrent et requistrent,
Si qu’a mort.xxi. an mistrent
Ençois que desfiez les aient.
Li traïtor mout s’an esmaient,
Si s’escrïent : « Traï, traï ! »,
Mes cil ne sont pas esbahi,
Car tant con desarmez les truevent,
Lor espees bien i espruevent ;
Car les.iii. en ont si charmez,
De ces qu’il troverent armez,
Qu’il n’an i ont que.v. lessiez.
Li cuens Angrés s’est eslessiez
Et vet sor son escu a or
Veant toz ferir Macedor,