Page:Chrétien de Troyes - Cligès, 1921.djvu/123

Et d’un vice mout merveilleus.
Et quant ot tot son pansé fet,
Lors s’est vers ses conpaignons tret,
Si lor a reconté et dit :
« Seignor, fet il, sanz contredit,
Se vos volez m’amor avoir,
Ou face folie ou savoir,
Creantez moi ma volanté. »
Et cil li ont acreanté
Que ja ne li seront contraire
De chose que il vuelle faire.
« Chanjons, fet il, noz conuissances,
Prenons les escuz et les lances
As traïtors que ci veons,
Ensi vers le chastel irons,
Si cuideront li traïtor
De nos que nos soiens des lor,
Et quiex que soient les dessertes,
Les portes nos seront overtes.
Et savez que nos lor randrons ?
Ou morz ou pris toz les prandrons,
Se Damedex le nos consant.
Et se nus de vos s’an repant,
Sachiez qu’an trestot mon aage
Ne l’amerai de boen corage. »
Tuit li otroient son pleisir.
Les escuz as morz vont seisir,
Si se metent an tel ator.
Et as desfanses de la tor
Les genz del chastel monté furent,
Et les escuz bien reconurent
Et cuident que de lor gent soient,
Car de l’aguet ne s’apansoient
Qui desoz les escuz se cuevre.
Et li portiers les portes oevre,
Si les a dedanz reçeüz.