Page:Chrétien de Troyes - Cligès, 1921.djvu/121

Mes as traïtors croist aïe,
Qui mout fieremant se desfandent
Et chieremant lor vies vandent.
Qant plus ne se porent tenir,
De.iiii. parz voient venir
Lor batailles por aus secorre.
Et li real lor lessent corre,
Tant con porent esperoner ;
Sor les escuz lor vont doner
Tex cos que avoec les navrez
En ont plus de.v.c. versez.
Li Grezois nes espargnent mie
N’Alixandres pas ne s’oblie,
Car de bien ferir se travaille.
El plus espés de la bataille
Vet ensi ferir.i. gloton
Que ne li valut.i. boton
Ne li escuz ne li haubers,
Ne li valut.i. cendal pers.
Qant a celui ot trives prise,
A.i. autre offre son servise,
Ou pas ne le pert ne ne gaste ;
Si cruelmant le fiert an haste
Que l’ame de son cors li oste,
Et li ostex remest sanz oste.
Aprés ces.ii. au tierz s’acointe :
Un chevalier mout noble et cointe
Fiert si par anbedeus les flans
Que d’autre part an saut li sans
Et l’ame prant congié au cors,
Que cil l’a espiree fors.
Mout en ocit, mout en afole,
Car, ausi con foudre qui vole,
Envaïst toz ces qu’il requiert ;
Et tant vistemant les requiert
Nes garantist broigne ne targe.
Si conpaignon resont si large