Page:Chrétien de Troyes - Cligès, 1921.djvu/120

Par tote l’ost as armes saillent,
D’armer se painnent et travaillent,
Si com a tel besoing estut ;
Onques uns seus d’ax ne se mut
Tant qu’a leisir furent armé.
Tuit sont sor lor chevax monté.
Quequ’il s’arment, et cil esploitent
Qui la bataille mout covoitent,
Por ce que desarmez les truissent
Et si que sorprandre les puissent,
Voient venir par.v. parties
Lor genz qu’il orent departies.
Li un devers le bois se tindrent,
Li autre la riviere vindrent,
Li tierz se mistrent anz el gal,
La quarte furent an.i. val,
Et la quinte bataille broche
Lez la tranchiee d’une roche,
Qu’il se cuidoient de randon
Parmi les trez metre a bandon.
Mes il n’i ont trovee pas
La voie sainne ne le pas,
Car li real lor contredïent,
Qui mout fieremant les desfïent
Et la traïson lor repruichent.
As fers des lances s’antrapruichent ;
Autresi fieremant ou plus
Corent li un as autres sus
Con li lyon a proie corent,
Qui quanqu’il ateignent devorent.
D’anbedeus parz por verité
I ot mout grant mortalité
A cele premiere envaïe ;