Page:Chrétien de Troyes - Cligès, 1921.djvu/117

Car bien vialt que le voir en oie
Cil qui de l’oïr a tel joie,
Qant cele li conte et devise
La feiture de la chemise,
Que a grant poinne se retarde,
La ou le chevolet regarde,
Que il ne l’aore et ancline.
Si conpaignon et la reïne,
Qui leanz erent avoec lui,
Li font grant mal et grant enui,
Car por aus let que il n’en toche
Et a ses ialz et a sa boche,
Ou mout volantiers la meïst
S’il ne cuidast qu’an le veïst.
Liez est quant de s’amie a tant,
Car il ne cuide ne n’atant
Que ja mes autre bien en ait ;
Ses desirriers doter le fait,
Nequedant quant il est an eise,
Plus de.c.m. foiz la beise.
Mout an fet tote nuit grant joie,
Mes bien se garde qu’an nel voie.
Qant il est colchiez an son lit,
A ce ou n’a point de delit
Se delite, anvoise, et solace.
Tote nuit la chemise anbrace,
Et quant il le chevol remire,
De tot le mont cuide estre sire.
Bien fet Amors d’un sage fol,
Qant cil fet joie d’un chevol ;
Mes il changera cest deduit.
Ensi se delite et deduit.
Einz l’aube clere et le soloil,
Li traïtor sont a consoil