Page:Chrétien de Troyes - Cligès, 1921.djvu/115

Mout est boenela cope d’uevre.
Et qui la verité descuevre,
Mialz que l’uevre ne que li ors
Valent les pierres de defors.
S’il est sergenz, la cope avra
Par cui li chastiax pris sera.
Et s’il est pris par chevalier,
Il ne savra querre loier
Avoec la cope, qu’il ne l’ait,
Se el monde trover se lait.
Qant ceste chose fu finee,
N’ot pas sa costume oubliee
Alixandres, qui chascun soir
Aloit la reïne veoir.
A ce soir i refu alez.
Assis se furent lez a lez
Alixandres et la reïne.
Devant aus, prochiene veisine,
Soredamors seule seoit,
Qui si volantiers l’esgardoit
Qu’an paradis ne volsist estre.
La reïne par la main destre
Tint Alixandre et remira
Le fil d’or qui mout anpira ;
Et li chevox anbloïssoit,
Queque li filz d’or palissoit.
Si li sovint par avanture
Que feite avoit cele costure
Soredamors, et si s’an rist.
Alixandres garde s’an prist
Et li prie, s’il fet a dire,
Qu’el li die qui la fet rire.
La reïne au dire se tarde,
Et vers Soredamors regarde ;
Si l’a devant li apelee.